بعض الاكلات المصرية

الحمام المحشى


المقادير :

( مطلوب)حمام بعدد افراد الاسرة او حسب الرغبة) .
كوب أرز _ أو حسب عدد الحمام
ملعقة صغيرة فلفل أسود
ملعقة صغيرة ملح _ بهارات _ ملعقة كبيرة كمون .
الكبد والقوانص بتاعة الحمام (بعد تقطيعهم لقطع صغيرة)
بصلة كبيرة أو بصلتين متوسطتي الحجم
ورق لورا _ 2 فص حبهان _ 2 فص مستكة _ 2 ملعقة كبيرة سمنة
(سمن و زيت للتحمير )

الطريقة:

- قومي بخلط البصل مع الملح والبهار والكمون والفلفل الأسود
- قومي بإضافة الكبد والقوانص المقطعين إلى الخليط
-اغسلي الأرز
- ضعي الخليط كله على الأرز مع السمنة و اخلطية كويس
- أبدأي بحشو الحمام واحدة واحدة
من الأسفل ومن عند الرقبة فوق (بشرط انك ما تمليش الحمامة بالحشو لأن الأرز يينفش وبيذيد فى الماء اثناء السلق
- اقفلى الحمام المحشي بوضع الرجلين فى الفتحة اللى تحت او خيطية بابرة و فتلة)
- ضعي الحمام في ماءمغلى وبصلة صغيرة وأوراق اللورا و ملح و كمون. مع ملاحظة ان تكون الحلة كبيرة عشان لو الحلة صغيرة على الحمام ممكن رجلين الحمام يقطع الحمام اللى جنبه على النار
-بعد ما يستوى نص سوا بنشيلة من الشوربة و نشوحة فى حلة تانية فيها ملعقة سمنة و الحبهان و المستكة ثم نصب عليهم الشوربه لحد ما الحمام يستوى
-بعد السوى تشيلية بالراحة فى طبق لحد ما يبرد
-ثم تحمرية فى مقلاية بها زيت و سمن


و بالهناء و الشفا






طريقة عمل العصاج







المقادير:

نص كيلو لحمة مفرومة _ بصلة متوسطة مفرومة ناعم _ملح فلفل اسود _2 ملعقة كبيرة سمن _ بهارات لحمة


الطريقه:



اضع السمن على النار الى ان يسخن ثم اضع البصل الى ان يصفر ثم اضع اللحمة المفرومة و اقلب واحدة واحدة بالمعلقة الى ان تستوى و يصبح لونها بنى اتبلها و اقلب ثم اشيلها من على النار .( اذا كنت عايزة العصاج بالصلصة اضيف للحمة على النار 2 ملعقة كبيرة صلصة طماطم و نص كوب ماء و اخليها تيتوى و تتسبك)






ثانيا طريقة عمل البشاميل






المقادير :

3ملعقة كبيرة سمن _2 ملعقة كبيرة دقيق_ حليب -ملح فلفل-_ 2 بيضة مضروبة بالشوكة _ ملعقة كبيرة قشطة

الطريقه :



اعمل البشاميل احسن فى حاجة غويطة اضع السمن على النار الى ان يسيح
اضع الدقيق على نار هادية و اقلب تقليبة بسرعة
ابدء بالراحة انزل الحليب الدافى بايدى الشمال و ايدى اليمين عمالة تقلب بسرعة بحركة دائرية و هكذا الى ان اصل بالبشاميل الى التخن اللى انا عيزاة اضع التوابل و البيض و اقلب تقليبة ثم اضع القشطة و اطفى النار و اقلب تقليبة






صينية المكرونة بالبشاميل





المقادير:

بشاميل كيس مكرونة فرن (ريجينا )_ 2 بيضة مضروبين بالشوكة_ و عليهم رشة ملح و فلفل_ 3ملعقة كبيرة جبنة رومى مبشورة

الطريقه :

اسلق المكرونة فى ماء مغلى مع زرة ملح و ملعقة زيت
اصفيها من ماء السلق و اشطفها كويس بالماء البارد واصفيها فى المصفاة
احضر صينية و ادهنها بشاميل مش سمنة
اضع البيض المضروب على المكرونة و اخلط بايدى كويس
ثم اضع بشاميل على المكرونة و الجبنة المبشورة و اقلب اقلب المكرونة لحد بالنظر لما الاقيها كلها فيها بشاميل كويس
اضع نص المكرونة فى الصينية و اسوية كويس ثم اضع العصاج اللى يصلصة و اسويه كويس ثم اضع باقى المكرونه و اسويها ثم اضع بشاميل على الوجة و افردة و اسوية كويس ثم ارش على الوش ملعقة كبيرة جبنة مبشورة و بيضة مضروبة ادخلها فرن متوسط الحرارة لحد ما تستوى و وشها حيحمر
وممكن برضة لما تطلع من الفرن تغطى الصينية حتلا قيها طريت و


بالهنا و الشفا



......................... ......................


بالنسبة للحمة المفرومة ممكن تعصجيها و حقولك ازاى ؟؟ وبعد ماتبرد تعبيها فى اكياس نايلون و تحطيها فى الفريزر ( عشان الصوانى _ المكرونة و الكوسة و المسقعة والخرشوف و البطاطس المحشية......الخ) يعنى الكيس الواحد يعمل صينية واحدة
- أو يتبل بالبصل و الثوم و الخضرة و التوابل و تشكلية زى ما انتى عايزة (مثل الكفتة) اما كور لداوود باشا او صوابع للشوى او صينية او بانية وذلك بعد عمل الكفتة تر صصيها جنب بعض فى طبق فل و تحطى الطبق فى كيس نايلون



-بانسبة البفتيك و الفراخ البانيه نتبلها و نحطها في أكياس في الفريزر ولما نخرجها اما نضعها على طول فى بيض و بقسماط و نحمرها او نحطها زى ماهيا فى صينية وتبقى صينية لحمة بالبصل او فراخ بالبصل .



-الفراخ المخلية من العظم ممكن تحشيها مثلا بالخضروات و تلفيها فى ورقة فويل و تحطيها فى الفريزر ولما تخرجيها على السوى على طول .







الحمام




............
ينظف جيدا و يتبل و يوضع فى طبق فويل فى الفريزر و لما تطلعية تعملية صينية كولبست.








السمــــــــــك





تنظف جيدا و تتبل و توضع في الأكياس ثم توضع في الفريزر حتى الاستعمال تخرجية و تحطية فى الدقيق و تقلية فى الذبت.
-اما السمك البانية مثل( فيلية البلطى او قشر البياض) تتبلية بس و تحطية فى كيس نايلون .ولما يطلع تحطية فى بيض و بقسماط






طبق مكرونة اسباجتي





المقادير:


كيس مكرونة اسباجتي مقطع 3 اقسام <<<<< عشان المكرونة متكونش طويلة اوي و تبقى اسهل في الاكل

4 او 5 بصلات كبار

5 شرايح هامبورجر أو فرانكفورتر أو هوت دوج

4 وحدات فلفل اخضر (رومي)

ملح و فلفل اسود و كاري و رشة بهارات

3 ملاعق كبيرة خل

3 فصوص توم كبار

سمن او اي نوع زيت تفضلوه

الطريقة:

نسلق المكرونة و نخليها على جنب

نقطع البصل اربع ارباع و بعدين شرايح عريضة و نقلبها في المادة الدهنية اللي عندنا. و بعدين نقطع الفلفل الاخضر اربع ارباع و بعدين شرايح عريضة و نقلبه مع البصل و بعدين التوم نقطعه شرايح رفيعة جدا جدا و نقلب معاهم و بعدين البرجر او الهوت دوج يقطع مكعبات و يتقلب معاهم و بعدين نضيف التوابل و الخل و نضيف شوية ماء و نقلب و كل شوية نضيف شوية ماء صغيرين اوي بس عشان البرجر يستوي، و لما يستوي تماما و برضه يكون فيه شوية ماء على خفيف نضيف له المكرونة و نقلبها كويس و لما تسخن نطفي عليها. و نقدمها مع الكاتشب و المستردة و المايونيز. صدقوني اكلة تحفة!!! و خفيفة جدا على المعدة و ممكن تكون عشاء او غدا او حتى فطار متأخر، لانها مش تقيلة على المعدة ابدا








الكبدة الاسكندراني






المقادير

1\2 ك كبدة (طبعا الكميات ترجع لكل واحد)

3 بصلات وسط

3 حبات فلفل رومي (بارد)

2 حبة طماطم

ملح و فلفل أسود و بهارات

فصين ثوم مدقوقين

ملعتين كبار صلصة طماطم

1\2 ملعقة خل

زيت ذرة


الطريقة:

تقطع الكبدة مكعبات صغيرة. يقطع البصل كالاتي: كل بصلة تقطع أربع إرباع و بعدين تقطعيها شرايح رقيقة نوعا. الفلفل برضه يقطع نصفين و بعدين شرايح رقيقة. الطماطم برضه نقطعها اربع ارباع و تقطع شرايح رقيقة.

نجيب الطاسة التيفال و نضع فيها الزيت لكن مش كتير ممكن ملعقة طعام أو اتنين. نضع البصل و نقلب حتى يذبل و لكن لا يصفر ثم نضيف الفلفل و نقلب حتى يذبل الفلفل كمان ثم نضيف الطماطم مع التقليب حتى تختلط بالباقي. ثم نضيف الكبدة و نقلب و نتبلها بالتوابل المذكورة. أما الخل و الصلصة و الثوم الدقوق نخلطهم مع ذرة سكر و نقلبهم كويس لحد ميبقى عامل زي الكاتشب و نضيفهم الى الكبدة بعد نضجها و لو محتاجة نقطة ميه ممكن نضيف شوية لكن الأفضل نسويها على نار هادية تقوم الكبدة تنزل المية اللي فيها و لا نحتاج مية من برة. و تقلب ثم تطفي النار. و تؤكل مع الخبز و سلطة الطحينة و السلطة الخضراء.






الدجاج البروست








المقادير:

دجاجة

بصل- ملح و قلقل و بهارات- ليمون- خل

دقيق

زيت للقلي


الطريقة:

نقطع الدجاجة 8 قطع و نعمل شقوق بالسكينة في كل قطعة

نضرب البصل في الخلاط و نضيف له التوابل و الليمون و الخل ثم نتبل الدجاج و نحاول نضع التتبيلة في الشقوق اللي عملناها.

نترك الدجاج المتبل في الثلاجة يوم كامل (كل ما تركت أطول كل ما شربت من التتبيلة اكتر و أنا مرة تبلتها و تركتها في الديب فريزر اسبوع و بعدين عملتها و كانت روعة!!)

نضع الزيت الغزير على النار حتى يسخن و بعدين نغمس كل قطعة دجاج في الدقيق (بدون بيض) ثم نقلي القطع على نار متوسطة (لأنها لو حامية الدجاج يستوي من الخارج و ميستويش حلو من جوة و لو هادية حتاخد وقت كتير قوي انتي اتحكمي في النار احسن)

تخرج ذهبية اللون و نضعها على مناديل ورقية لتمتص الزيت ثم تقدم مع السلطات و الخبز او المكرونة